Texnologiyalar va innovatsiyalarni qo‘llab-quvvatlash markazlari 4-Milliy anjumani bo‘lib o‘tdi.

Bugun, Adliya vazirligi huzuridagi Intellektual mulk markazi mezbonligida “O‘zbekiston Respublikasi texnologiyalar va innovatsiyalarni qo‘llab-quvvatlash markazlari IV-Milliy anjumani” o‘tkazildi.

Anjumanda Innovatsion rivojlanish agentligi rahbariyati hamda Yashnobod innovatsiya texnoparki deriktori , Yangi ishlanmalarni tijoratlashtirish va iqtisodiyot tarmoqlari bilan hamkorlikni rivojlantirish boshqarmasi mutaxassislari, intellektual mulkchilik sohasida faoliyat ko‘rsatayotgan tashkilotlar vakillari, olimlar hamda mas’ul davlat idoralari vakillari ishtirok etdilar.

Tadbir ochilishida Innovatsion rivojlanish agentligi direktori v.v.b. A. Norov so‘z olib, mamlakatimizda intellektual mulk tizimini rivojlantirish va intellektual mulk bilimlariga ega avlodni shakllantirish borasidagi tizimli ishlar amalga oshirilayotganligini qayd etib, bu borada Innovatsion rivojlanish agentligi tomonidan manfaatdor tashkilotlar bilan hamkorlikda amalga oshirilayotgan ishlar to‘g‘risida to‘xtalib o‘tdi.

Tadbir doirasida Innovatsion rivojlanish agentligi huzuridagi “Yashnobod” innovatsiya texnoparkida Texnologiyalar va innovatsiyalarni qo‘llab-quvvatlash markazi tashkil etish yuzasidan “Yashnobod” innovatsiya texnoparki va Intellektual mulk markazi o‘rtasida Hamkorlik bitimini imzolash marosimi bo‘lib o‘tdi.

Shuningdek, Anjuman sessiyalari davomida Intellektual mulk markazi mutaxassislari, oliy ta’lim muassasalari va ilmiy tashkilotlarning yetakchi olimlari tomonidan ma’ruzalar qilinib, mavzular bo‘yicha qizg‘in savol-javoblar bo‘lib o‘tdi.

Takidlash lozimki, Respublikamizda intellektual mulk obyektlarining yaratilishi, “patent” tizimi holati va istiqbollari kabi masalalar kuni-kecha “Texnologik barqarorlik va texnologik peshqadamlik sari” shiori ostida “InnoWeek.Uz-2025” xalqaro innovatsion g‘oyalar haftaligida ham muhokama qilindi, Innovatsion rivojlanish agentligi huzuridagi Ilmiy-texnik axborot markazi qoshida Texnologiyalar va innovatsiyalarni qo‘llab-quvvatlash markazi ochildi.

Shu bilan birga Innovatsion rivojlanish agentligi huzuridagi Ilmiy-texnik axborotlar markazida “Patent tadqiqotlari va ixtirochilikni qo‘llab-quvvatlash bo‘limi” ham o‘z faoliyatini boshladi.

Intellektual mulk markazi va Innovatsion rivojlanish agentligining birgalikdagi sa’y-harakatlari ushbu sohadagi jarayonlarning jadallashishiga xizmat qiladi. Chunki oliy ta’lim muassasalari va ilmiy tashkilotlarda tashkil etilgan Texnologiyalar va innovatsiyalarni qo‘llab-quvvatlash markazlari sohalar muammolariga ijodiy yondashuv, g‘oyalarning paydo bo‘lishi, intellektual mulk obyektlarining yaratilishi, huquqiy himoyalanishi, baholanishi, tijoratlashtirilishi va innovatsiyalar darajasiga ko‘tarilishi jarayonlarida o‘z yetakchilik o‘rniga ega.